اختبار الجلد عن طريق الوخز مجموعة من الاسئلة تجيب عليها الدكتورة غادة شوشة

ايه هو اختبار حساسية الجلد عن طريق الوخز؟
ده اختبار بنعمله علشان نعرف قابلية الجسم للحساسية من مادة معينة، زي أنواع الاكل المختلفة وزي الأتربة وزي حبوب اللقاح وزي الكلاب والقطط وحاجات تانية كتير جدا.
يعني لما اعمل الاختبار هاعرف ابني عنده حساسية من ايه؟
إلى حد كبير اه… بس الأول لازم نعرف التاريخ المرضي للطفل والحاجات اللي بيتعرض لها في حياته اليومية علشان نقدر نحصر قائمة الحاجات اللي بيتعرض لها واللي ممكن تكون سبب الحساسية , وبعد كده بنعمل الاختبار لكل حاجة منهم لوحدها.

هل التحليل ده بيوجع ؟ وحعرف النتيجة بعد كام يوم؟
التحليل مش مؤلم خالص.. ده مجرد خدش بسيط في الجلد وبيتعمل على الذراعين أو الظهر.. والنتيجة بتظهر على الجلد في خلال 15-20 دقيقة.

يعني ده مش تحليل دم!!! طيب ممكن اعمله لابني اللي عمره سنة؟
لا مش تحليل دم وممكن من اول عمر شهر واحد.. وهو اختبار آمن ومالوش مضاعفات طالما بيتعمل بطريقة صح وفي مكان متخصص وطبيب مختص ومكان مجهز.

طيب الاختبار ده موجود فين؟ ومين اللي بيعمله؟
الاختبار موجود في عيادات الحساسية والمناعة في المستشفيات الجامعية. تحديدا في مستشفى الأطفال الجامعي في جامعة عين شمس ومستشفى أبو الريش بقوائم انتظار وبيعمله دكتور متخصص في امراض الحساسية والمناعة.
واحنا حالياً بنقدم الخدمة دي حاليا في عياداتنا.

ليه لازم اعمله في مكان كبير أو عند استشاري متخصص؟
لأن الامصال المستخدمة لازم تكون مطابقة للمعايير والمواصفات العالمية عشان ما يحصلش اي مضاعفات او تفاعلات مناعية غير محسوبة وقت الاختبار.

فيه اي احتياطات نعملها قبل الاختبار؟
في أدوية ممنوع اعطاءها للطفل قبل الاختبار بأسبوع على الأقل : ادوية الحساسية، أدوية البرد المحتوية على مضادات للهيستامين زي الكلاريتين والمحتوية على الكورتيزون. وممنوع وضع اي كريمات أو مرطبات على الظهر و الذراعين قبل الاختبار ب 12 ساعة.

طيب استنى لما الطفل يجيله حساسية واجيبه يعمل الاختبار ولا استنى يخف؟
الاختبار مش بيتعمل والطفل تعبان أو عنده اعراض حساسية زايدة.. لأنه ممكن يتسبب في زيادة هذه الاعراض وممكن كمان يدينا نتائج مش دقيقة يعني قبل ما نحجز معاد الاختبار نتأكد ان الطفل مش بيعاني من أعراض الحساسية زي الهرش والاحتقان وضيق التنفس واحمرار الجلد نستنى لما يخف خالص.

هل نمنع الطفل من الأكل مثلا قبل الاختبار؟
لا خالص وإذا هنعمل الاختبار على الأطعمة، بنستخدم الفاكهة والخضروات الطازجة… أما بالنسبة للألبان أو القمح او البيض أو السمك او السمسم أو الصويا أو اللحوم أو المكسرات فدي بيكون ليها امصال جاهزة بنشتغل الاختبار بيها.

طيب معلش يا دكتور طولت عليك بس آخر سؤال هو الاختبار تكلفته كام ؟
الأسعار مختلفة لأن بعد التاريخ المرضي المفصل بنحدد مع ولي الأمر حنعمل الاختبار لكم مادة وتكلفة مادة واحدة غير اتنين غير تمانية لكن التكلفة ككل تتراوح بين 700 إلى 900 جنيه حسب الفئات.

ملحوظات:
1- لا يمكن إعطاء استشارة طبية عن طريق الانترنت دون الكشف السريري على المريض.. رجاءً توجه لأقرب طبيب أطفال.
2- لا تعتمد على روشتات الأصدقاء والأطفال ذوو الحالات المشابهة ولا وصفات الصيادلة.. ماتضيعش وقتك في الجروبات والناس اللي بتوصف ادوية لبعض أغلب الحالات بتجيلنا بعد ما تكون اتدهورت احفظ وقتك وابنك وبنتك وتوجه لأقرب طبيب.

 

لمزيد من المعلومات:

د/ غادة شوشة استشاري أمراض الحساسية والمناعة في الأطفال

عيادة مستشفى د. عبد القادر فهمي: 23 شارع حسن أفلاطون مدينة نصر – القاهرة
عيادة مصر الجديدة : 130 شارع عثمان بن عفان خلف الكلية الحربية أمام صن مول
تليفون : 0222918700 – 01221111172
الفيس بوك: https://m.facebook.com/drghadashousha/

التعليقات

التعليق