ضرس العقل من دكتور محمد خليفة

بداية ظهور ضرس العقل غالبا بيسبب لمعظمنا حالة من التوتر والقلق خاصة عشان الآلام اللي بتصاحبه لكن مفيش داعي للقلق والتوتر لان دكتور محمد خليفة عضو الأكاديمية الأمريكية لتجميل الاسنان وطبيب بالجمعية المصرية لزراعة الاسنان حيوضح لقراء طبيب اون لاين في المقال ده ايه سبب الألم ده وازاي نعالجه

حتكلم معاكم النهارده عن موضوع مهم يخص ضرس العقل, لازم نكون عارفين ان ضرس العقل بيبدأ رحله ظهوره من 16 ولحد 22 سنه 😬

احيانا بيكون الفك السفلي صغير انه يدي مساحه لضرس العقل انه يظهر فيبدأ ضرس العقل في المقاومة علشان يجيب حقه 😁

المقاومة دي بتكون نتيجتها يا اما بيقدر يطلع بشكل سليم بس بعد ما ضغط علي الاسنان وحركها للأمام وبالتالي بتلاقي الاسنان الأمامية بقت فوق بعضها واثر علي شكلها .

او الاحتمال التاني ان ضرس العقل بيخسر في الحرب دي وبالتالي بيضطر انه يغير مساره ويطلع بميل وبشكل غير صحيح لكن للأسف الميل ده بتكون نتايجه مش كويسه

اولا: بيعمل ضغط علي الضرس اللي جمبه ودا ممكن يسبب الم وتآكل في الضرس ده.

ثانيا: بيظهر منه جزء بسيط في الفم وبالتالي بيفضل جزء من اللثة عليه لكن الجزء ده بقي اشبه بحفره بيدخل جواها الاكل والبكتريا وبيكون صعب تنظيفها وبالتالي بيحصل فيها التهاب ووجع كبير خاصه كمان ان الجزء ده من اللثة بيبدأ ضرس العقل في الفك العلوي يضغط عليه مع العض ودا بيزود الالتهاب والالم اللي بيوصل لدرجه الصداع والم في الفك كمان.

الحل بيكون لو الضرس طالع بشكل سليم فبنشيل جزء اللثة ده لكن لو الضرس طالع بميل زي الصورة كدا فالحل ان لازم ضرس العقل يتخلع وبكده بتكون المشكلة اتحلت تماما.

علشان كدا لو حسيت ان فيه وجع وقت طلوع ضرس العقل متقلقش وارد يكون ده طبيعي لكن وارد يكون فيه مشكله علشان كدا لازم ترجع لطبيبك علشان لو هيعمل مشكله نلحقها في اولها 😊

لمزيد من المعلومات:

د: محمد خليفه

عضو الأكاديمية الأمريكية  لتجميل الاسنان

وطبيب بالجمعية المصرية لزراعه الاسنان

العنوان: 13 شارع محمود رضا سيدي بشر الإسكندرية

تليفون: 01001624787

صفحة الفيس بوك: https://www.facebook.com/dentist.khalifa/

التعليقات

التعليق