أدوية علاج الكورونا المنتشرة على وسائل الانترنت بين الصواب والخطأ من دكتورة غادة شوشة

 ☠️انتشرت مؤخرا على وسائل التواصل الاجتماعي روشتات جاهزة، بالجرعات، وأسامي الأدوية، مع نصائح لاستخدامها في المنزل بدون الرجوع للطبيب, عن هذه الأدوية تتحدث  دكتورة غادة شوشة  استشاري أمراض الحساسية والمناعة في الأطفال لقراء موقع طبيب اون لاين وتحدد موقفها تجاه هذه الأدوية

ايه الصح✔️ وايه الغلط❌؟

❌ ما تاخدش أدوية بدون استشارة طبيب في حالتك او حالة طفلك، لأن كل مريض ليه ظروف غير التاني، حسب السن، والوزن، والنوع، حسب مكان المعيشة، حسب وجود أمراض مزمنة، أو أي أدوية تانية.. ما تتهاونش في صحتك

❌ حتى الفيتامينات لازم تحت إشراف طبيب، علشان ما تاخدش جرعات زيادة ، وكده كده دورها محدود في مواجهة فيروس كورونا فضلا عن علاجه

 ❌أدوية كتير ليها آثار جانبية خطيرة جدا، أساميها منتشرة على صفحات التواصل الاجتماعي، زي مذيب الجلطات ومضادات التخثر وزي أدوية الملاريا…. رجاءا ، الأدوية دي لا تعطى الا تحت إشراف طبيب.

 ❌ اعراض كورونا مختلفة ومتنوعة ، الغالبية العظمى ما عندهمش اعراض او اعراض بسيطة (ودول بينشروا العدوى بسرعة) ، الاقلية اللي عندهم اعراض قوية، لازم نفهم ان مش كل الأعراض سخونية وضيق في التنفس، فدايما ناخد احتياطاتنا

 ❌فيه ناس بتروح المستشفيات وبتتردد على الدكاترة لأي شكوى بسيطة، من فضلك الزم بيتك طالما مفيش شكوى كبيرة ومهمة.
وفيه ناس خوافة زيادة عن اللزوم وبتستنى اللحظات الأخيرة علشان تروح المستشفى، من فضلك لو فيه اعراض زيادة شوية لازم تسأل وتكشف، الوصف لوحده مش كافي لأي دكتور

 ❌ الدكتور مش هينقل لك العدوى، لأن جزء من شغله انه يحمي نفسه ويحميك، ومعظم الدكاترة ملتزمين بكل احتياطات الوقاية والتطهير. الدور عليكم في الالتزام بالاحتياطات وطرق الوقاية

✔️ التهوية الجيدة، التعرض للشمس، شرب مياه بكميات كبيرة، أكل فاكهة وخضار بعد غسلهم جيدا مهمين جدا لتحسين أداء جهاز المناعة

✔️ ممارسة تمارين رياضية مهما كانت بسيطة، يوميا

✔️علموا أولادكم غسيل الايدين بالصابون بطريقة سليمة

✔️ بلاش اختلاط، بلاش زحمة، نلبس الماسك، بلاش نلمس أي أسطح خارج المنزل

🌹حياتك وصحتك أمانة
🌹حافظوا على نفسكم، حسنوا مناعتكم بالأكل الصحي المتوازن، التزموا بتعليمات الحماية والأمان

🌺 دمتم أصحاء


لمزيد من المعلومات:
  د/ غادة شوشة استشاري مدرس واستشاري طب الأطفال وحديثي الولادة بكلية الطب
استشاري أمراض الحساسية والمناعة والأمراض الروماتيزمية للأطفال
*مستشفى د. عبد القادر فهمي: 23 شارع حسن أفلاطون متفرع من شارع النزهة أرض الجولف
يومي الأحد والخميس من الساعة 7 م
تليفون: 222918700
*عيادة مدينة نصر: 22 شارع الطيران بعد مسجد رابعة العدوية فوق فودافون
أيام السبت والاثنين والأربعاء من الساعة 8 م
تليفون: 011101006434
*مستشفى كليوباترا مصر الجديدة: 41 شارع كليوباترا الكوربة
يوم الثلاثاء من 5 الى 7 م
تليفون: 19668  
*عيادات كليوباترا التجمع الخامس: خلف جامعة المستقبل
يوم الخميس من 4 الى 6 م
تليفون: 19668   
صفحة الفيس بوك:    https://www.facebook.com/drghadashousha/