أهم أسباب آلام الركبة عند الأطفال من دكتورة غادة شوشة

دكتورة غادة شوشة استشاري أمراض الحساسية والمناعة في الأطفال توضح لقراء موقع طبيب اون لاين أهم المفاهيم الخاطئة المرتبطة بآلام الركبة عند الأطفال وأهم الأسباب المؤدية لهذا الشعور.

ألم الركبة شكوى متكررة عند الأطفال، وللأسف ناس كتير لما بيسمعوا الشكوى دي بسرعة بيعملوا تحليل الميكروب السبحي ويلا يبدأوا حقن بنسيلين طويل المفعول على إن الطفل ((اشتباه)) حمى روماتيزمية.

تعالوا نصلح بعض المفاهيم الخاطئة ونقول الأسباب المختلفة لآلام الركبة عند الأطفال

 ألم المفصل لوحده مش كافي لتشخيص الحمى الروماتيزمية  لازم تورم واحمرار والتهاب في مفصل أو أكتر، والطفل ما بيقدرش يتحرك من شدة الألم, والالتهاب ده بيخلص في مفصل ويتنقل لمفصل تاني… الشكل ده من الالتهاب بالإضافة إلى لخبطة في شوية تحاليل ممكن نشخص بيهم حمى روماتيزمية… واي عيان يتشخص حمى روماتيزمية لازم يعمل رسم قلب وموجات صوتية ((ايكو)) على القلب..

أما حقنة البنسيلين، بتتاخد عضل كل أسبوعين مدى الحياة, يعني مش ٣ شهور ولا ٦ شهور ولا سنة ولا وقاية من الحمى.

طيب يحصل ايه لو ادينا الحقنة (احتياطي) ؟

أولاً: ده مضاد حيوي.

ثانياً: واحد من أكتر الأدوية اللي بتعمل حساسية، ولازم كل مرة يتعمل اختبار حساسية قبل إعطاء الحقنة.

ثالثاً: الحقنة فعلا مؤلمة جدا.

رابعاً: اذا بدأتها هتكمل عليها مدى الحياة.

يبقى نتأكد الأول من تشخيص الحمى الروماتيزمية، وبلاش نعتمد على الميكروب السبحي ويبقى كل همنا كأطباء وكمرضى ازاي ((نعالج)) التحليل العالي.

بالمناسبة، نسبة الميكروب السبحي عند المصريين ((العادي بتاعها)) لغاية ٦٦٠, مش زي النسب العالمية اللي المعامل بتكتبها في نتايج التحاليل.

 النقطة التانية، ايه أسباب آلام الركبة عند الأطفال؟

لو الألم ده معاه التهاب وتورم واحمرار :

١- التهاب صديدي.

٢- التهاب مناعي تفاعلي  يعني بعد عدوى المفاصل تورم لمدة أسبوعين أو ثلاثة وتخف بعد كده تماماً.

٣- التهاب مناعي مزمن  زي الروماتويد والذئبة الحمراء والتهابات الأوعية الدموية ولستة طويلة من الأمراض.

٤- خبطة أو كدمة.

٥- حمى البحر المتوسط  وده التهاب متكرر ومعاه سخونة.

٦- بعض الميكروبات المزمنة زي الدرن والايدز وفيروس سي الكبدي.

٧- بعض الأورام الخبيثة.

۸- التهاب الأمعاء التقرحي.

٩- بعض أمراض الدم زي الأنيميا المنجلية والهيموفيليا.

ايه أسباب آلام الركبة اللي من غير تورم او التهاب؟

١- أشهر سبب هو وضعية الجلوس او النوم او المشي.

٢- نقص فيتامين د ((لين العظام)) وده شائع جدا في الدول العربية عموماً.

٣- هشاشة العظام, غالبا بسبب استخدام الأدوية اللي فيها كورتيزون بشكل متكرر أو لمدة طويلة بدون إعطاء كالسيوم وفيتامين “د”.

٤- ألم تفاعلي  زي التهاب المفاصل التفاعلي كده.

٥- واحد من الأعراض الأولى للأمراض الروماتيزمية زي روماتويد المفاصل والذئب الحمراء ومرض بهجت وغيرها من أمراض الأوعية الدموية والمناعة الذاتية.

٦- فيه ألم متكرر مصاحب ليه ارتفاع في الحرارة حمى البحر المتوسط.

٧- ممكن يحصل ألم في المفاصل مع الحرارة العالية زي التهاب اللوزتين او التهاب الاذن الوسطى او الالتهابات الرئوي ده مش حمى روماتيزمية.

٨- ليونة الأربطة, ده مرض وراثي بنلاقي ان الطفل بيقدر يحرك مفاصله اكتر من العادي، وده بيعمل آلام في المفاصل وطقطقة مع الحركة.

٩- أحياناً واحد من علامات الأورام لا قدر الله.

١٠- الخبطات والكدمات حتى لو قديمة، ممكن تسيب أثر في المفصل وتسبب ألم من وقت للتاني.

١١- العيوب الخلفية في المفاصل أو الأربطة أو العضلات.

١٢- وجود التهاب في العضلات أو العظام القريبة من المفصل.

١٣- ضعف أو ضمور العضلات.

١٤- بعض الأمراض والميكروبات المزمنة زي الدرن وفيروس سي الكبدي والايدز.

١٥- مرحلة سن البلوغ فيه ظاهرة مشهورة بتسبب ألم تحت الركبة في مكان السجود، ودي حاجة مؤقتة بتتحسن مع السن.

  • يبقى زي ما فيه أسباب بسيطة ومش مستاهلة، فيه كمان أسباب مقلقة وتستاهل اننا نستشير متخصص.. ومش كل ألم في الركبة يبقى حمى روماتيزمية

#دمتم_أصحاء

لمزيد من المعلومات:

 د/ غادة شوشة استشاري

 مدرس واستشاري طب الأطفال وحديثي الولادة بكلية الطب
استشاري أمراض الحساسية والمناعة والأمراض الروماتيزمية للأطفال
*
مستشفى د. عبد القادر فهمي: 23 شارع حسن أفلاطون متفرع من شارع النزهة أرض الجولف
يومي الأحد والخميس من الساعة 7 م
تليفون: 222918700
*
عيادة مدينة نصر: 22 شارع الطيران بعد مسجد رابعة العدوية فوق فودافون
أيام السبت والاثنين والأربعاء من الساعة 8 م
تليفون: 011101006434
*
مستشفى كليوباترا مصر الجديدة: 41 شارع كليوباترا الكوربة
يوم الثلاثاء من 5 الى 7 م
تليفون: 19668  
*
عيادات كليوباترا التجمع الخامس: خلف جامعة المستقبل
يوم الخميس من 4 الى 6 م
تليفون: 19668   
صفحة الفيس بوك: https://www.facebook.com/drghadashousha/