أطفالنا من أهم وأكبر نعم ربنا علينا واي خربوش صغير فيهم بيتعبنا ويألمنا أكتر ما بيألمهم لكن نظراٌ للعوامل الجوية تحديداٌ في الأماكن الساحلية الأطفال بيكونوا أكثر عرضه للإصابة بحساسية الصدر أو الجيوب الأنفية أو الاثنين مع بعض وده طبعا بيكون ليه بعض الاثار الجانبية اللي ممكن تظهر بنسبة متفاوتة بين الأطفال فمهم جدا للآباء والأمهات معرفة الاثار الجانبية ليها عشان يتجنبوا تعنيف الأطفال على حاجة خارجة تماما عن ارداتهم.
عشان كده دكتورة غادة شوشة استشاري أمراض الحساسية والمناعة في الأطفال حتعرفنا على واحد من أشهر الآثار الجانبية لحساسية الصدر والجيوب الأنفية اللي في كتير من الآباء والأمهات محتاجين يعرفوه ويفهموا أزاي يتصرفوا لو لا قدر الله وجهتهم المشكلة دي وهي العلاقة بين حساسية الصدر والجيوب الأنفية وبين عدم القدرة في التحكم في البول؟
💥هل فيه علاقة بين حساسية الصدر والجيوب الأنفية وبين عدم التحكم في البول عند الأطفال
✍️الإجابة: نعم
💥ليه بيحصل كده؟
✍️الكحة المتكررة واللي بتطول عند مرضى الحساسية
✍️النوم المتقطع اللي بيخلي الطفل لما بيقدر ينام، ممكن ما يصحاش علشان يروح الحمام من كتر التعب
✍️زيادة الضغط الداخلي في البطن بسبب ان حساسية الصدر بتخلي الرئة تاخد مساحة اكبر شوية من العادي، وده بالتالي بيضغط على المثانة
✍️بعض الأدوية زي أدوية الحساسية اللي بتنيم
✍️الأطفال اللي الحساسية عندهم مش متضبطة وبيضطروا ياخدوا كورتيزون كتير، وده بيخليهم عرضة للالتهابات في مجرى البول، وكمان ارتفاع نسبة السكر في الدم
✍️عامل نفسي بسبب طول فترة التعب والأدوية وزيارات الدكاترة
💥ايه أعراض اضطرابات التبول في الحالات دي؟
👈تبول لا إرادي وقت النوم
👈مايقدرش يمسك نفسه مع الكحة او الضحك الشديد
👈ماينفعش يتقال له كمان شوية ابقى روح الحمام. هينقط على نفسه. وده ممكن يحصل في المدرسة أو في الباص أو وقت السفر
👈التهابات متكررة في مجرى البول وألم وقت التبول والطفل يتزنق فجأة ويجري على الحمام، وينزل كمية قليلة بس كل شوية يجري على الحمام. وممكن هرش وممكن مغص
👈انطوائية وأعراض اكتئاب وعدم ثقة في النفس
💥طيب نتصرف ازاي في الحالات دي؟
💎 تضبيط الحساسية والسيطرة على الأعراض مهم جدا جدا، والالتزام بتعليمات الدكتور المتخصص واستشارته في أنظمة العلاج المختلفة
💎لازم نقول للدكتور اول ما نلاحظ حاجة من الأعراض اللي قولناها عشان يقدر يعمل تحاليل ويعالج بدري قدر الإمكان
💎بعض الحالات بتحتاج الاستعانة باستشاري كلى أطفال واستشاري مسالك بولية أطفال
لمزيد من المعلومات:
د/ غادة شوشة استشاري
مدرس واستشاري طب الأطفال وحديثي الولادة بكلية الطب
استشاري أمراض الحساسية والمناعة والأمراض الروماتيزمية للأطفال
*مستشفى د. عبد القادر فهمي: 23 شارع حسن أفلاطون متفرع من شارع النزهة أرض الجولف
يومي الأحد والخميس من الساعة 7 م
تليفون: 222918700
*عيادة مدينة نصر: 22 شارع الطيران بعد مسجد رابعة العدوية فوق فودافون
أيام السبت والاثنين والأربعاء من الساعة 8 م
تليفون: 011101006434
*مستشفى كليوباترا مصر الجديدة: 41 شارع كليوباترا الكوربة
يوم الثلاثاء من 5 الى 7 م
تليفون: 19668
*عيادات كليوباترا التجمع الخامس: خلف جامعة المستقبل
يوم الخميس من 4 الى 6 م
تليفون: 19668
صفحة الفيس بوك: https://www.facebook.com/drghadashousha/
