انقذي حياتك وقت الحمل

مجموعة من النصائح الهامة التي تقدمها دكتورة نهي حلاوة  أخصائي النساء والتوليد لقراء طبيب اون لاين لكيفية اختيار طريقة الولادة ما بين الطريقة الطبيعة أو القيصرية   

لو كنتي حامل يبقى ده أهم بوست بالنسبالك لآنه ممكن يكون السبب في إنقاذ حياتك أيوة قرتيها صح إنقاذ حياتك الغالية.

لما تيجي تحددي مع دكتور النساء ميعاد ووقت الولادة لازم تكوني فاهمة كذا نقطة قبل ما تقولي أنا عاوزة قيصرية علشان ألم الولادة الطبيعية.

1- حضرتك ينفع تولدي 30 طفل طبيعي إنما صعب جداً تولدي 5 قيصرية.

2- لو كنتي بكرية وولدتي قيصري يبقى باقي ولاداتك هتكون قيصرية بنسبة كبيرة جداً.

3- تقدري تروحي بيتك بعد الولادة الطبيعية بساعتين بدون ألم لكن لو ولدتي قيصري هتنتظري 12 ساعة على الأقل في المستشفى وهيبقى عندك ألم في الجرح مستمر لغاية ما الجرح يقفل ويلتأم تماماً.

4- بعد الولادة الطبيعية بتمارسي حياتك بشكل طبيعي جداً وبتتحركي بكل سهولة وتعملي كل اللي عوزاه، لكن بعد القيصرية بيكون فية جرح في بطنك ومحتاجة راحة نسبية مقارنة بالولادة الطبيعية وممكن تقعدي أسبوع مش قادرة تثني بطنك وممكن جرح القيصرية يلتهب لو إستحميتي وجت على الجرح مية ملوثة.

5- البيبي اللي مولود قيصرية احتمالات إنه يدخل الحضانة أعلى من البيبي المولود طبيعي.

6- ممكن يحصل مشكلة أثناء القيصرية خارجة عن سيطرة الدكتور ويضطر يعملك استئصال للرحم وده بيحصل لحالة في كل 100 حالة تقريباً.

7- ممكن يحصلك مشكلة أثناء القيصرية وتطلعي من العمليات على الرعاية (الإنعاش) وده بيحصل بردو لحالة في كل 100 حالة تقريباً.

8- ممكن بعد ما تخرجي من العمليات تدخليها تاني بسبب وجود نزيف داخلي أو وجود بقايا للمشيمة في الرحم.

9- ممكن يحصلك جلطة في رجلك أو جلطة في الرئة تؤدي للوفاة بعد القيصرية، وده نادر لكنه وارد الحدوث.

10- ممكن يحصل التصاقات شديدة بعد القيصرية تؤدي لتمزق المثانة أو الأمعاء في القيصرية اللي بعدها أثناء فتح البطن، وده بردو نادر لكنه وارد الحدوث.

11- ممكن الرحم ينفجر في الحمل اللي بعد كدا وده بردو نادر لكنه وارد الحدوث.

12- ممكن يحصل مشيمة متقدمة أو ملتصقة تعملك نزيف طول الحمل وتهدد حياتك لو محدش لحقك ووداكي مستشفى كبيرة جداً فيها بنك دم كبير وممكن تاخدي حوالي 30 كيس دم في بعض الظروف وممكن 
توصل لأكتر من كدا، وده نادر لكنه وارد الحدوث.

13- ألم الولادة الطبيعي بينتهي بالولادة لكن القيصرية بيبدأ بعد الولادة.

لو الدكتور اللي بيتابعك شايف عندك مشكلة تستدعي القيصرية هيبلغ حضرتك بيها وهتعملي القيصرية لان مش هينفع معاكي الطبيعي في حالتك، لكن لو حالتك كويسة ومفيش عندك حاجة تمنع الولادة الطبيعي وكان عندك إصرار على الولادة القيصرية يبقى إنتي بتلقي بنفسك في التهلكة ولازم تكوني فاهمة كل المشاكل الواردة اللي فوق أثناء القيصرية ولا تلومي 
الطبيب عند حدوثها.

نرحب بأي استفسار طبي.

لمزيد من المعلومات:

دكتورة: نهي حلاوة

         أخصائي النساء والتوليد

العنوان: ٥٢ شارع الطيران امام مستشفى تأمين صحي مدينه نصر

تليفون: 01015044464

          24051340/02

 المواعيد: السبت من كل اسبوع من الساعة ٤:٣٠عصرا حتى ٧:٣٠ مساءً

صفحة الفيس بوك:  https://www.facebook.com/Dr-Noha-Halawa-%D8%AF-%D9%86%D9%87%D9%89-%D8%AD%D9%84%D8%A7%D9%88%D8%A9-284577165514070/

إيميل: drnona16888@gmail.com