مرض الذئبة الحمراء واحد من أشهر أمراض المناعة الذاتية ومن أهم الأمراض الروماتيزمية في الكبار والأطفال, ما هي أعراضه وكيف يتم تشخصيه وكيف يمكن علاجه كل هذه التساؤلات تجيب عنها دكتورة غادة شوشة استشاري أمراض الحساسية والمناعة في الأطفالتوضح لقراء موقع طبيب اون لاين
يعني ايه مرض مناعة ذاتية؟ ويعني ايه مرض روماتزمي؟
مناعة ذاتية يعني اضطراب ولخبطة في خلايا الجسم المناعية، تخليها بدل ما تدافع عن الجسم تهاجمه وده بيحصل بدون سبب واضح،
نسبة قليلة جدا جدا بيكون وراثي، يعني خلل في الجينات
واللي بيظهر أعراض المرض ده اما ضغط نفسي شديد او عدوى فيروسية او بكتيرية.. لكن الأمراض المناعية عموما ((غير معدية))
مرض روماتزمي: يسبب التهاب مزمن (اكتر من أسبوعين) في المفاصل مع احتمال إصابة العضلات والعظام والجلد
الصفة المشتركة بين الحاجتين دول، ان كل الأدوية المستخدمة هدفها ((اخماد او خمول)) المرض، والسيطرة على الأعراض، ومنع حدوث تبعات وتطورات ومضاعفات.. لكن مفيش علاج ((شافي)) تماما.. ولا حتى في الدول الاوروبية والامريكية
المرض ده بيجي في الأطفال؟
للأسف أيوة… هو مرض شائع اكتر في البنات قبل سن البلوغ مباشرة، لكن ممكن يصيب الأولاد كمان، وممكن يظهر في سن مبكر ( ٥ سنوات(
طب ايه هي أعراضه؟ وهل لازم كلها تكون موجودة؟
لا، مش لازم خالص كل الأعراض تكون موجودة في كل مريض، فيه حالات بيبقى عندهم حاجتين او تلاتة… وفيه حالات نصيبها بيجي لهم معظم الأعراض…
عشان كده علاج مرض الذئبة بيختلف من مريض للتاني، والاستجابة للعلاج مختلفة كمان ، والمتابعة المنتظمة مهمة جدا جدا جدا خصوصا في السنة الأولى من المرض
نشوف مع بعض أهم المشاكل:
- الجلد: احمرار في الوجه، خصوصا في الشمس، التهابات في الجلد بأشكال مختلفة، تقرحات في الوجه أو داخل الفم
- آلام او تورم والتهاب في المفاصل، وآلام في العظام
- الكلى: دم او زلال في البول، وممكن كمية البول تتأثر، ضغط دم مرتفع، تورم في القدمين او الساقين
- وفي حالة إصابة الكلى لازم عينة من الكلى لتحديد درجة الإصابة
- القلب: التهاب وارتخاء في عضلة القلب، جلطات، ارتشاح حول القلب، تليفات بدرجات مختلفة في الرئة،
- الاعصاب: صداع شديد مستمر، زغللة في العين، تشنجات، هلاوس، حركات لا ارادية، عصبية وهياج عصبي
- التهاب مناعي في الغدة الدرقية او البنكرياس او الكبد
- خمول في النخاع الشوكي، تكسير في الدم والصفائح الدموية، جلطات متعددة
تشخيص وطرق العلاج المختلفة وطريقة المتابعة:
ازاي نتأكد من التشخيص؟
١ -أعراض المرض الاكلينيكية:
زي حرارة مستمرة بقالها أسابيع، فقدان شهية ووزن، آلام في الجسم، تورم في المفاصل، تساقط الشعر بشكل مبالغ، أو واحدة من الأعراض الكبيرة
٢- مجموعة من التحاليل لتشخيص المرض:
من ضمنها سرعة الترسيب ومجموعة من الأجسام المناعية المميزة للأمراض الروماتزمية ولمرض الذئبة الحمراء تحديدا
٣- فحوصات لمعرفة مدى تأثر أجهزة الجسم المختلفة، ودي تختلف حسب الأعراض اللي المريض بيشتكي منها… منها فحوصات لتقييم حالة الكلى، أو الأعصاب ، أو القلب وغيرهم
نعالج ازاي؟
نتفق الأول إن ده مرض مزمن، يعني الأصل فيه انه مكمل مع المريض.. وان الهدف من العلاج هو تحسين اعراض المرض وتجنب مضاعفات ودخول المريض في حالة خمول مرضي لأطول وقت ممكن وبأقل أدوية ممكنة
عندنا ٣ محاور أساسية في العلاج :
١- أكل ونظام حياة: الاكل كله صحي، خالي الملح والسكر، قليل الدسم. مفيش تعرض مباشر للشمس، لازم نستخدم واقي الشمس
٢- كورتيزون: ليه صور كتير مختلفة، كل مريض بياخد النوع والجرعة المناسبة لحالته الصحية وطبيعة المرض والسن والوزن….
الكورتيزون أساسي في السيطرة على اعراض المرض. زي ما قلنا، هدفنا ان المريض حالته تستقر بأقل جرعات أدوية لأطول فترة ممكنة وفي الحالات دي، مفيش بديل للكورتيزون، ولازم نلتزم بتعليمات الدكتور لتجنب آثاره الجانبية، وعلشان نعدي مرحلة الخطورة بسلام
٣- أدوية مثبطة (منظمة) للمناعة:
ودي مجموعات مختلفة من الادوية، منها الكيميائي ومنها البيولوجي، وبردو استخدامها حسب حالة كل مريض وطبيعة المرض عنده. وطبعا لازم تستخدم تحت إشراف استشاري متخصص في الأمراض الروماتيزمية لدى الأطفال… واحب دايما افكر حضراتكم ان طبيعة الطفل غير الكبير، من حيث طبيعة المرض ونشاطه واستجابته على العلاج
الأدوية دي هي اللي بتسيطر على نشاط الذئبة في أجهزة الجسم المختلفة، وبتساعدنا اننا نقلل جرعات الكورتيزون بالتدريج
مريض الذئبة الحمراء لازم يروح متابعته بانتظام، على الأقل مرة كل شهر… وممنوع يوقف او يعدل في جرعات الأدوية بدون الرجوع للمتخصص اللي بيتابع الحالة
لمزيد من المعلومات:
د/ غادة شوشة استشاري
مدرس واستشاري طب الأطفال وحديثي الولادة بكلية الطب
استشاري أمراض الحساسية والمناعة والأمراض الروماتيزمية للأطفال
*مستشفى د. عبد القادر فهمي: 23 شارع حسن أفلاطون متفرع من شارع النزهة أرض الجولف
يومي الأحد والخميس من الساعة 7 م
تليفون: 222918700
*عيادة مدينة نصر: 22 شارع الطيران بعد مسجد رابعة العدوية فوق فودافون
أيام السبت والاثنين والأربعاء من الساعة 8 م
تليفون: 011101006434
*مستشفى كليوباترا مصر الجديدة: 41 شارع كليوباترا الكوربة
يوم الثلاثاء من 5 الى 7 م
تليفون: 19668
*عيادات كليوباترا التجمع الخامس: خلف جامعة المستقبل
يوم الخميس من 4 الى 6 م
تليفون: 19668
صفحة الفيس بوك: https://www.facebook.com/drghadashousha/
